Philippine E-Journals

Ang Bamboo Organ ng Las Piñas: Pakikipanayam sa Apat na Susing Indibidwal ukol sa Kultural na Yaman ng Lungsod ng Las Piñas

Jezryl Xavier Genecera | Jay Israel B. De Leon

Discipline: philosophy and religious studies

 

Abstract:

Ipinakikilala sa papel na ito ang Las Piñas Bamboo Organ bilang isang kultural na yaman. Sa pamamagitan ng pakikipanayam sa maituturing na apat na susing indibidwal na may kinalaman sa bamboo organ, tinatalakay sa papel ang kasaysayan, kasalukuyang kalagayan, at mga gawaing kaugnay ng pangangalaga at pagtataguyod ng bamboo organ. Napili ang pakikipanayam, isang metodo ng kasaysayang pasalita, upang maibahagi mismo ng mga taong sangkot ang kanilang sariling gunita at karanasan na hindi karaniwang natatampok sa mga dokumentong naisulat tungkol sa bamboo organ. Natukoy ang sumusunod na temang nangibabaw sa pakikipanayam: (1) pagpapakilala kay Padre Diego Cera bilang organ builder, (2) mga udyok sa paggamit ng kawayan bilang pangunahing materyal ng bamboo organ, (3) kalidad ng tunog ng bamboo organ, (4) restorasyon ng bamboo organ, (5) pagsisimula, mga layunin, at mga gawain ng Bamboo Organ Foundation, Inc., (6) pagsisimula at mga layunin ng International Bamboo Organ Festival at mga gawaing kaugnay nito, (7) mga suliraning kinakaharap ng bamboo organ, at (8) kahalagahan ng pagsasanay ng mga susunod na organista. Tinukoy rin ng mga mananaliksik ang mga implikasyon ng konserbasyon ng bamboo organ sa mga aspektong ekonomiko, panlipunan, pangkapaligiran, at pangkultura ng buhay-lipunan ng lungsod batay sa mga potensiyal nito para sa pag-unlad. Ang papel na ito ay maaaring mapakinabangan ng mga mananaliksik sa hinaharap bilang primaryang batis para sa bamboo organ at maging para sa kasaysayang lokal ng Las Piñas.